De Gunsdschbrache

De Gunsdschbrache

Garle und Ernsd treffn's'sch in der Schdrooßenbohn.

- Du, Garle, ols'sch neilich in der Zweje noch Gonnewids gefohrn bin, do hams'sch welche off Esborando underhalden.

- Nee Ernsd, dos gloobsch nich.

- Doch, dos gonnsde mir schon gloomn.

- Nee, do bin'sch sicher, dos dos nich schdimmd.

- Na wenn's'sch dor abor sache.

- Nee Du, de Zweje fährd doch gor nich noch Gonnewids.

En andrer Bossaschier, had dos Geschbräsch belauschd.

- Sachn Se mol, was issn dos eischndlich - Esborando.

- Das is enne Schbrache, missn Se wissn.

- So was wie Säggs'sch?

- Nee, dos is enne Gunsdschbrache.

- Enne Gunsdschbrache? Was heesdn dos?

- Na die is for de Ginsdler, missen Se wissen. Weil die doch indernadsschional arbeiden missen, wennse nich vorhungern wolln. Wenn eener aus Leibdsch en Margdblads odern Glods mald, das goofd hier doch geener, heeschdns noch ä Messegosd. Na und do muss'er de Beindings eben wo annersch vorgoofen, in Ameriga oder in Schina. Aber weil Se da geen Säggs'sch gänn, da muss'ers äbende mid Esborando brobiern.

- Ach un desderweeschen heesd das also Gunsdschbrache.

- Das dengsch mer jedenfolls so.

- Na un is das leichd dsu lern, dis Esborando?

- Nee dos is dsiemlich schwär. Ich geh nämlisch in son Esborandogurs, missn Se wissn, ledsde Woche hammers harde Bee gelernd und gesdorn wors Dsungn-Är dran, das gehd ungefär so: Chchchchchchoooou. Nu herjeemersch, da mus'sch wol noch ä bissl iebn.

- Oh, sch'gloobe hier mus'sch naus. Dschissie.

- Machn'ses gud.

Ernsd und Garle fahrn noch ä bissl weidor.

- Du, sache mol, Ernsd, mid dem Esborando, gann mor da och Briefmorgen indernadsschional golegdiern?

- Na warum'dn nisch.

- Isch gloobe, da gommsch mol mid dsu deim Gurs. Wennsch'm Ärwin donn de fieln Briefmorgen von dr gansen Weld zeische, da wärd der abor schdaun.


Esperanto-Jugend Sachsen
Esperanto-Junularo de saksujo